प्रेम कुणावरही करू नये!

आपण आपलं मस्तीत जगावं
हॉटेलात जावं.. खावं - प्यावं...
पोरींचं बिल उगाच भरू नये;
प्रेम कुणावरही करू नये!
प्रेम म्हणजे
एक अजब गेम असते
जिच्यासाठी आपण धडपडतो
...तडफडतो
ती चक्क
दुसऱ्याची डेम असते
सत्य ध्यानी आल्यावर
फुक्कटचं झुरू नये;
प्रेम कुणावर करू नये!
म्हणे-
प्रेम म्हणजे
एक पवित्र नातं असतं!
अहो, कसचं काय!
प्रेम म्हणजे
एक विचित्र जातं असतं...
दळणारं आंधळं
दळदळ दळत असतं
आणि पीठ मात्र
भलतचं कुत्र खात असतं
आपण दळलेल्या पिठावर
ऐऱ्यागैऱ्याने चरू नये;
म्हणून आपणच
प्रेम कुणावर करू नये!
चेहऱ्यावरचं चांदणं तिच्या
कितीही दुधाळ असलं,
गुलुगुलू बोलणं तिचं
कितीही मधाळ असलं,
तरी...
शहाण्यानं मधमाशी
हातात धरू नये;
प्रेम कुणावरही करू नये!

शिरस्ता...

व्यवस्थापक - आज आमच्या जलतरण तलावाचा प्रथम वर्धापनदिन... आणि या तलावाचे उद्घाटक मंत्रिमहोदय यांचा प्रथम स्मृतिदिन....
पत्रकार - म्हणजे?
व्यवस्थापक - अहो, मंत्रिमहोदयांचा शिरस्ताच तसा होता. केशकर्तनालयाचे उद्घाटन त्यांनी स्वतःचे केस कापून केले, तर भोजनालयाचे भोजन करूनच!
पत्रकार - मग इथे काय केले?
व्यवस्थापक - उद्घाटन समारंभाला आल्या आल्या त्यांनी जलतरण तलावात छान सूर मारला आणि....
पत्रकार - आणि काय?
व्यवस्थापक - त्यांना पोहता कुठे येत होतं...!